【賀歲片】《飯戲攻心》黃子華王菀之有默契　張繼聰珍惜與家人共處時光

日前黃子華、張繼聰及王菀之作客TVB娛樂新聞台節目《StarTalk》，接受主播許文軒（Edmond）專訪，大談合作新戲《飯戲攻心》感受。

王菀之直言可與黃子華合作大感緊張，她說：「好彩之前客串過子華神執導嘅電影，有咗上次嘅合作，令今次冇咁驚，一開工已經有種親和力，好快就令自己放心，好容易投入。」

談到電影令觀眾更珍惜與家人同枱食飯，張繼聰說：「我同父母一齊住，外母又住得好近，所以成日一齊食飯，由細個唔識得珍惜，最好唔好叫埋我一齊食，因為覺得好悶，到依家想返屋企食飯，每次都有種興奮、好期待嘅感覺，同屋企人食飯係最期待嘅娛樂，會好珍惜同家人相處重要性。」

至於子華稱：「我覺得電影有一種莫明奇妙嘅溫暖。我會返屋企食媽咪煮嘅飯，最重要嘅係無論佢煮咩，都唔可以彈，一定要食晒，一定要講好食，打包埋返屋企更好！」

王菀之則說：「最開心嘅係我會同爸爸去老爺奶奶到打牌，食咩都冇所謂，最重要係食糊！我嘅技術係可以去到佢哋成日想搵我打！」